Dîmenên qirkirina daran a li Dorşînê derketin holê   

2025-10-01 10:08:16


	AMED - Li quntarê Çiyayê Dorşînê yê navçeya Pasûrê zêdetirî 20 roj in dar tên birîn. Dîmenên qirkirina daran a ji hêla cerdevan û hin kesan ve tên kirin, asta texrîbata li herêmê jî radixe ber çavan. 

	 

	Li Mezra Xuş a girêdayî gundê Eskarê yê li quntarê Çiyayê Dorşînê yê navçeya Pasûr Amedê, zêdetirî 20 roj in cerdevan û hin kes daran dibirin. Rojê 5 kamyonên daran tên birîn û ji herêmê tên derxistin. Tê gotin ku heta niha zêdetirî 100 kamyonên daran hatine birîn. Dîmenên darên hatine birîn, texrîbata li herêmê jî radixin ber çavan. 

	 

	Hat zanîn ku qirkirina daran a li quntarê çiyê bi destê cerdevan û hin kesên li Taxa Eskarê ve tê kirin, dê li seranserî quntarê çiyê bidome. Ji bo kamyonên dar lê barkirî bi rehetî bên û biçin jî li herêmê rê tê çêkirin. 

	 

	BERTEKA LI DIJÎ BÊDENGIYÊ 

	 

	Şêniyekî gund têkildarî qirkirina daran agahî da û got ku tevî qedexeyê jî dar tên birîn û ev nayê qebûlkirin. Her wiha welatiyan got ku texrîbata li herêmê zêdetirî 20 roj in didome lê di serî de ekolojîst heta niha tu kesekî dengê xwe dernexistine û bertek nîşan dan. 

	 

	MA / Fethî Balaman