Li Arjantînê bi pêşengiya sendîkayên karker, parêzer, çapemenî û femînîstan di çarçoveya pêngava "Azadî ji Abdullah Ocalan re, çareseriya siyasî ji pirsgirêka kurd re' li parzemînê kampanyayek tê destpêkirin. Li ser banga Tevgera Jinên Kurd sendîkayan, saziyên mafên mirovan û siyasetmedaran ji bo kampanyayê bang kirin. Kampanya wê 13'ê Mijdarê bi civîneke çapemeniyê destpê bike û heta 23'ê Mijdarê dewam bike.

 

Îmzeyên bêne komkirin wê ji Corte Inter America û saziyên pêwendîdar ên Konseya Ewropayê re bêne şandin. CTA Autonoma ku banga ji bo kampanyayê kir, têkildarî kampanyayê dîmenek amade kir. Aktîvîstên mafên mirovan ên ku pêşengiyê ji kampanyayê re dikin ji bo beşdariya li kampanyayê dîmenek weşandin. Parlamenterên Partiya Karker ên li Parlamenta Arjantînê jî ji bo tevlîbûna li kampanyayê bang kirin.

 

BANGÊN JI BO TEVLIBÛNÊ 

 

Peyamên kesên ku ji bo kampanyayê bang kirin bi vî rengî ne:

 

Julian Aguirre, Director de Internacionales de CTA Autónoma: “Abdullah Ocalan zêdeyî 25 sal in li girtîgeheke dewleta tirk girtî ye, ji ber dilsoziya wî ya bi maf, azadî û rûmeta gelê kurd û gelên cîhanê, li gel gelek saziyan em daxwaza azadiya Ocalan dikin. Ji CTA Otonom em xwedî soz û çalakiya piştevaniya bi wan re, bi doza wan re ne, ku ji bo azadiya xwe têkoşîneke mafdar dimeşînin. Ji ber vê yekê ji 13'ê Mijdarê roja Çarşemê em ê tev li kampanya li Arjantînê ya ji bo azadiya Abdullah Ocalan bibin.

 

‘DIVÊ EM JI BO OCALAN DENGÊ XWE BILIND BIKIN’ 

 

Parlamenter, Vanina Biasi: “Ji kongreya neteweyî ya Arjantînê, ji bloka yekbûyî ya eniya çep a Partiya Karker ez Vanina Biasi me. Beriya her tiştî silavên xwe ji wan jinan re dişînim ku ji bo xaka xwe, ji bo gelê kurd û gelên Kurdistanê têdikoşin û di nava hêzên parastnê de ne. Bi dîtina min, ji bo parastina gelê Kurd û jiyana azad a li xaka xwe, ev şer di çarçoveya xweparastinê de pêwîstî ye. Bêguman silavên xwe ji milîtanên jin û mêr ên Tevgera Azadiyê ya Kurdistanê re dişînim ku di bin bombardûmana dewleta tirk de li ber xwe didin û têkoşînê mezin dikin û di şexsê Abdullah Ocalan de divê em dengê ji bo azadiya hemû girtiyên siyasî bilind bikin. Bêguman em daxwaza aştiyeke mayinde dikin. Û daxwaza naskirina nasnameya Kurd û xaka Kurdistanê dikin. Û herî dawî em dixwazin dewleta Tirk û hemû dewletên ku polîtîkaya îmhayê dimeşînin dawî zextên li ser gelê Kurd bînin, mafên gelê Kurd bidin û em dixwazin Kurd li ser xaka xwe bi rengekî azad bijîn."

 

‘EM DAXWAZA AZADIYA HEVRÊYÊ XWE DIKIN’

 

Parlamenter, Mónica Leticia Schlotthauer: “Li Parlamenta Neteweyî ya Arjantînê parlamenter im. Ji eniya çep, sosyalîst, ji Partiya Karker im. Li gel rêxistinên din em daxwaza azadiya hevrêyê xwe dikin. Ji bo azadiya Abdullah Ocalan û daxwaza mafên gelê kurd em bang dikin."

 

Femînîst Claudia Korol: “Endama Femînîstên Abya Yala me. Li xaka Abya Yala ku weke parzemîna Emerîkayê tê naskirin, Femînîstas Abya Yala toreke rêxistinî ya li parzemînê ye. Wateya parzemîna me ya ku weke Abya Yala tê naskirin, bi zimanê gelê xwecihî tê wateya xwîna bi rengekî azad diherike.

 

Em dixwazin tecrîda li ser Rêberê Gelê Kurd Abdullah Ocalan bi temamî bê rakirin, ku agahîwergirtina ji Ocalan ji bo nirxên me yên mezin ên ku em temsîl dikin, gelekî girîng e. Em dixwazin ku şert û mercên pêwîst ji bo Abdullah Ocalan bêne afirandin ku karibe rola xwe ya lîdertiyê bimeşîne û çareseriyeke aştiyane û wekhev ji Kurdistanê û Rojhilata Navîn re peyda bike. Ji ber vê yekê em bang li tevgerên mafên mirovan, rêxistinên gel, komeleyên civakî yên sivîl û partiyên siyasî dikin ku ji bo kampanya 'Azadî ji Abdullah Ocalan re, çareseriya siyasî ji pirsgirêka Kurd re' li Arjantînê îmzeyan kom bikin, banga tevlîbûna li kampanyayê dikin."

 

Parêzvanê mafên mirovan Carlos Lorgipanitsi: “Ez endamê pêkhateya milîtan a Kachiti Fugman im û di heman demê de endamê Arjantin Encuentro Memoria, Verdad y Justicia (Bîra Edalet û Heqîqetê) me. Dixwazim mafên Abdullah Ocalan bê misogerkirin. Ji bo karibe di çareseriya aştiyane û wekhev a li Kurdistanê û Rojhilata Navîn bi rola xwe rabe, divê tecrîd bê rakirin."

 

METNA KAMPANYAYÊ

 

Naveroka nameya ji bo kampanyayê hatî amadekirin bi vî rengî ye: “Bi ser komploya navneteweyî ya li dijî Abdullah Ocalan 26 sal derbas bûn.  Ji roja bi komploya navnetwey hatî revandin û heya niha li Girtîgeha Îmraliyê (Tirkiye) ji mafên xwe hatiye mehrûmkirin û bi êşkence û miameleya xirab rû bi rû ye.  Abdullah Ocalan ku ji roja hatî girtin heya niha di bin şert û mercên dijwar ên tecrîdê de tê renhîngirtin û ev 4 sal in jî têkiliya wî ya bi derve re hatiye qutkirin. Piştî 4 salan di 23’yê Cotmeha 2024’an de destûr hate dayîn ku bi biraziyê xwe Omer Ocalan re hevdîtineke kurt pêk bîne.  Abdullah Ocalan ê ku wê di meha Nîsanê de bikeve 75 saliya xwe weke rêberê gelê Kurd tê zanîn, ji çareseriya aştiyane û demokratîk ya pirsgirêka Kurd aktorê sereke ye. Tevî ku heya niha gelek caran bangên agirbest û diyalogê kirine jî hemû caran ev hewlên wî bi polîtîkayên îmha û êrîşê tên pûçkirin. Di çarçoveya pêngava ‘Azadî ji Abdullah Ocalan re, çareseriya siyasî ji pirsgirêka Kurd re’ de  em dixwazin tecrîda heyî were bi dawîkirin û di heman demê de li gorî biryara Dîwana Edaletê ya Ewropayê em dixwazin Abdullah Ocalan mafê xwe yê hêviyê bi kar bîne û were berdan.  Ji ber vê yekê em di 13’ê Mijdarê de li gel civîneke çapemeniyê kampanyayeke îmzeyan li dar dixin. Konferansa çapemeniyê wê li navenda giştî a CTA-Autonomayê di saet 17.00’an de were lidarxistin. Em hemû saziyên eleqedar vedixwînin kampanyaya ku wê 10 rojan berdewam bike.”