Bi îdiaya “endamtiya rêxistinê” derheqê Hevşaredarê Dêrsimê Cevdet Konak û Şaredarê Navçeya Pulurê Mûstafa Sarigul de doz hatibû vekirin. Danişîna dozê di 20’ê mijdarê de hate lidarxistin û li Konak û Sarigul 6 sal û 3 meh cezayê hefsê hate birîn. Tevlibûna merasîma cenazeyê û meşên li dijî talankirina xwezayê, weke hinceta cezayê ji bo Konak hatin nîşandan. Gelek derdoran bertek nîşanî cezayê dan û li avahiya Şaredariya Dêrsimê nobet hate destpêkirin. 

 

Hevşaredarên Dêrsimê Cevdet Konak û Bîrsen Orhan, têkildarî biryara hatiye dayin axivîn. 

 

‘ÊRIŞEKE LI DIJÎ ÎRADEYA GELÊ DÊRSIMÊ YE’ 

 

Hevşaredar Cevdet Konak, biryara hatiye dayin weke biryareke siyasî nirxand û got: “Êrişeke li dijî îradeya gelê Dêrsimê ye. Doz, di dawiya sala 2022’yan de hatiye vekirin. Min du serdeman şaredartiya Xozatê kir. Weke şaredar, berpirsyartiyên min hene. Yek ji van jî ew e ku êş û keyfxweşiya gelê xwe parve bikim. Ya din jî ew e ku li dijî êrişên ser xwezaya me mafê xwe yê demokratîk bi kar bînim û xwedî helwest bim. Tevlibûna merasîmên cenazeyan, geştên xwezayî û bikaranîna mafên demokratîk weke sûc hatine nîşandan. Polîtîkayên şerê taybet ên dewletê hatin bikaranîn. Heke ev sûc bin, em ê vî sûcî her bikin. Soza me ji bo nirxên me, dîroka me heye. Berpirsyartiyên me ji bo xaka me, ziman, nasname û yên bêcang radizên hene.” 

 

Konak, diyar kir ku di roja danişînê de li bajar rewşeke awarte hatiye afirandin û wiha pê de çû: “Ji saet 08.00-12.00’ê ve polîsan anonsa ‘wesayîtan ji rêyan rakin’ dikirin. Heta hewl dan wesayîtên li pêşiya avahiya me ya xizmetê jî rakin. Beriya danişînê, zextekî psîkolojîk kirin. Amûrên şerê taybet bi kar anîn.” 

 

‘WALÎTIYÊ DI ROJA DANIŞÎNÊ DE AGAHÎ XWEST’ 

 

Bi domdarî Konak bi lêv kir ku mutalaaya dosyaya wî di 28’ê cotmehê de hatiye teblîxkirin û 22 roj piştre roja danişînê hatiye diyarkirin. Konak, wiha domand: “Bi zanebûn ev pêvajo bilez xistin. Midûriyeta Îdarî û Venêrînê ya Walîtiya Dêrsimê di roja danişînê de ji 1’emîn Dadgeha Cezayên Giran re nivîs şand. Di nivîsê de derheqê dosyayê de agahî hatin xwestin. Me ev ewraq di dosyayê de dît. Bi vê daxwazê hewl dan li ser dadgehê zextê bikin. Her wiha, di 19’3e mijdarê saet di 13.24’ê de ji arşîva Midûriyeta Giştî ya Sicîla Edlî û Îstatîstîkê ya Wezareta Dadê belge hatiye standin. 1’emîn Dadgeha Cezayên Giran rojek beriya danişînê ev belgeye xistiye nav dosyayê.” 

 

‘GELÊ DÊRSIMÊ LI DIJÎ VÊ BIRYARÊ BIBERTEK E’ 

 

Konak, anî ziman ku gelê Dêrsimê xwedî li îradeya xwe derketiye û ew hilbijartine û li dijî vê cezayê bibertek e. Konak, anî ziman ku armanca wan ew e ku di çarçoveya rêveberiyên herêmî yên demokratîk de xizmetê ji gel re bikin û wiha dirêjî da axaftina xwe: “Deriyên şaredariya me ji gel re vekirî ne. Bi gel re me bûdçe amade kir, bi gel re me pêdivî diyar kirin û me bi hev re xebat meşandin. Vê jî pergal aciz kir. Li Wanê ceribandin û li berxwedana gel qelibîn. Îradeya gelên Esenyurt, Mêrdîn, Colemêrg, Êlih û Xelfetiyê xesp kirin. Dixwazin heman tiştî li me bikin. Em vê helwestê qebûl nakin. Gelê Dêrsimê jî vê biryarê qebûl nake.” 

 

‘EM LI SER PEYWIRA XWE NE’

 

Konak, anî ziman ku dê li dijî van polîtîkayan mafên xwe yên demokratîk bi kar bînin û got: “Dema em li sed salên dawî yên vî welatî dinêrin, em her dem rastî bêhiqûqtiyan hatine. Peywira me ya esasî xizmeta gel e. Em ê van erk û berpirsyartiyên xwe bi cih bînin. Em li ser peywira xwe ne.” 

 

‘AMADEKARIYÊN TAYÎNKIRINA QEYÛM IN’

 

Hevşaredar Bîrsen Orhan jî destnîşan kir ku rewşa awarte ya di roja danişînê de amadekariya tayînkirina qeyûm e û wiha axivî: “AKP, hewl dide li şaredariyên winda kirî qeyûman tayîn bike. Bi taybet jî êrişî destkeftiyên jinan dike. Gelek sazî girtin. Her wiha qeyûm diz in. Gelê Dêrsimê dê destûrê nede derbeya qeyûm û xwedî li îradeya xwe derkeve. Heta ev biryara derhiqûqî tê betalkirin dê nobeta me bidome. Em vê biryarê nas nakin. Gelê Dêrsimê nas nake. Şaredariya Dêrsimê ya dêrsimiyan e. Bedela wê çi dibe bila bibe em ê şaredariya xwe neterikînin. Bi sala ye li ser Dêrsimê, zext, zilm, polîtîkayên şerê taybet hene. Hûn kî ne ku hêz û rayeya xespkirina îradeya gel di xwe de dibînin? Banga me ji bo hemû dêrsimiyan ew e ku vê berxwedanê mezin bikin. Tu Dêrsimên din tune ne. Em hewl didin Dêrsimê jinûve ava bikin.” 

 

MA / Şîrvan Şîlan Çîl