ENQERE - “Meşa Çareseriya Demokratîk û Azadiyê” gihişt Enqereyê û meşvanan daxuyanî dan. Di daxuyaniyê de wiha hage gotin: “Ji bo rakirina tecrîda girankirî, çareseriya pirsgirêka Kurd a li ser bingeha muzakereyan û demokratîkbûna Tirkiyeyê, em bang li Meclisê dikin ku li berpirsyartiya xwe ya dîrokî rabe.”
Piştî bangawaziya rewşenbîran a li Stenbolê, di 16’ê Kanûnê de bi pêşengtiya Platforma Saziyên Demokratîk ji Amedê ber bi Enqereyê ve “Meşa Çareseriya Demokratîk û Azadiyê” hate destpêkirin û meş piştî Amed, Riha, Dîlok, Edene û Mêrsînê, gihişt Enqereyê. Meşvanên ku Hevserokên Giştî yên Partiya Herêmên Demokratîk (DBP) Çîgdem Kiliçgun Uçar û Keskîn Bayindir jî tê de cih digirtin, hatin pêşiya deriyê Meclisê. Bi tevlibûna Hevserokên Giştî yên Partiya Wekhevî û Demokrasiyê ya Gelan (DEM Partî) Tulay Hatîmogûllari û Tuncer Bakirhan û nûnerên rêxistinên civaka sivîl, li ber Deriyê Çankayayê yê Meclisê daxuyanî hate dayin.
Hevseroka Giştî ya DBP’ê Çîgdem Kiliçgun Ûçar li ser navê meşvanan û rewşenbîran metna hevpar xwend. Çîgdem Kiliçgun beriya daxuyaniyê qetilkirina rojnamevan Nazim Daştan û Cîhan Bîlgîn şermezar kir û got ku ew ê her bibin şopdarên Çapemeniya Azad û heqîqetê.
‘TECRÎDA LI ÎMRALIYÊ HIQÛQA NAVXWEYÎ Û NAVNETEWEYÎ XITIMANDIYE’
Metna ku ji hêla Çîdem Kiliçgun Ûçar ve hat xwendin wiha ye:
“Li Tirkiyeyê îradeya çareseriya demokratîk ji hêla deshtilatdariyê ve hatiye xitimandin. Bi vê xitimandinê re li Îmraliyê li ser birêz Abdullah Ocalan rejîma tecrîda mutleq hat destpêkirin. Îro jî tecrîd bi şiklekî giran berdewam dike. Tecrîd tê wateya xitimandina hiqûqa navneteweyî, mafên mirovan û hiqûqa neteweyî. Tecrîd bûye belgeya neçareserkirina pirsgirêka Kurd a bi awayek demokratîk û Tirkiye ji demokrasiyê, hiqûqê û edaletê dûr bûye. Bi tecrîdê re hiqûq temamî hatiye xitimandin. Tecrîd tê wateya redkirina çareseriya demokratîk. Ev tecrîd tercîha siyasî ya desthilatdariyê ye. Tecrîda li Îmraliyê bûye çavkaniya otorîterbûn û dubendiya civakî.
Ji bo pêşî li demokrasiyê, serdestiya hiqûqê û pêvajoya aştiyê were vekirin gava ewil a çareseriyê rakirina tecrîdê ye. Ji bo rakirina tecrîda girankirî, çareseriya pirsgirêka Kurd a li ser bingeha muzakereyan û demokratîkbûna Tirkiyeyê, em bang li Meclisê dikin ku li berpirsyartiya xwe ya dîrokî rabe.
DIVÊ TECRÎD WERE RAKIRIN
Di vê çarçoveyê de em bang dikin; divê tecrîda li ser birêz Abdullah Ocalan were rakirin û dikaribe ji bo çareseriyê û aştiyê bi rola xwe rabe divê şert û mercên azad werin afirandin. Em bang li her kesî dikin ku li dijî tecrîdê rabin û pênûsa xwe bidin xebitandin û gotina xwe bêjin.
BANG LI MECLISÊ KIR
Em bang li Meclisê dikin ku demildest tecrîda mutleq rake û çareseriya demokratîk wek wezîfeyek û berpirsiyarek dîrokî li ber Meclisê sekinandî ye. Her kesê ku aştî û demokrasiyê dixwaze divê li dijî tecrîdê dengê xwe bilind bike û ji bo çareseriya demokratîk û serdestiya dadê û hiqûqê bi rola xwe rabin.”
‘DIVE BIRÊZ OCALAN AZAD BIBE’
Piştre jî Hevberdevka HDKê Meral Daniş Beştaş axivî û qetilkirina rojnamevan Nazim Daştan û Cîhan Bîlgîn şermezar kir û ji malbatan, Çapemeniya Azad û gelê Kurd re sersaxî xwest. Meral Daniş Beştaş destnîşan kir ku divê demildest şert û mercên ku Rêberê PKK’ê Abdullah Ocalan dikaribe bi rola xwe rabe werin afirandin û wiha got: “Pêwîste birêz Ocalan gavek beriya gavekî azad bibe.”