ENQERE - Temenê Bager Sayak hate mezinkirin û cezayê muebbeta girankirî lê hate birîn. Sayak, diyar kir ku heman tişt di biryarên Seyîd Riza û Erdal Eren de jî hatiye kirin û got: “Ev ceza, şêweyê darvekirinê yê modern e.” 

 

Bager Sayak li Girtîgeha Hejmar 1 a bi Ewlekariya Bilind a Sîncanê tê ragirtin. Sayak, têkildarî girtina xwe ji Ajansa Mezopotamyayê (MA) re nameyek şand. Sayak, di nameya xwe de da zanîn ku bi biryara dadgehê temenê wî hatiye mezinkirin û bi awayekî derhiqûqî cezayê muebbeta girankirî lê hatiye birîn. Sayak, diyar kir ku şandeya dadgehê ya ceza li wî birî ji ber endamtiya FETO’yê hatiye îxrackirin lê tevî vê jî biryar nehatiye guherandin. 

 

‘DEWLETÊ TEMENÊ MIN MEZIN KIR Û CEZA DA’ 

 

Sayak, di nameya xwe de wiha got: “Ji sala 2010’an heta niha girtî me. Dema hatim binçavkirin û girtin, hêj zarok bûm (17 salî bûm). Dewletê temenê min mezin kir û cezayê muebbeta girankirî li min birî. Tu zirara min ji bo tu kesekî çênebûye. Weke mînak, min tu kes ne kuştibû. Zirara min negihiştiye tu kesî. Min mal û milkê tu kesî xesp nekir! Min mal û milkê tu kesî nediziye. Jixwe heke min wiha bikira ez niha di girtîgehê de nedibûm. 

 

WEZÎRÊ DADÊ LI XWE MIKÛR HAT

 

Ji ewil ji bo min gotin ‘dema sûc kirî hêj zarok bû’ û bi vê boneyê doz vekirin û ceza xwestin. Heta ji ber ku emrê min biçûk bû, gotin dê piştî îfadeyê li dozgeriyê bêm berdan. Bêguman heke min li ser kesên qet nas nakim îfade dabûya an jî min bêbextî li wan bikira... Bêguman min tiştên dihatin xwestin nekir. Lewma bi hestên tolhildanê nêzî min bûn. Emrê min hate mezinkirin û cezayê muebbeta girankirî dan min. Wezîrê Dadê yê demê Sadullah Ergîn, li Meclisê bersiv da pêşnûmepirseke der heqê min de û bi gotina ‘Belê temenê wî hate mezinkirin’ li xwe mikûr hat. Vê îtîrafa wezaretê, rastiya girtîmayina min neguherand. Axaftineke dema min li dozgeriyê îfade dida anî bîra min. Dozgerî ji min pirsa ‘Gelo tu kadroyê çiyê yî?’ kir. Min jî bersiv nedabû. Polîsê li wir bû şahidê bêdengiya min, got; ‘Heke kadroyê çiyê nebe jî, potansiyela wî heye.’ Ji ber ‘potansiyeleke’ wiha, bi sala ye girtî me. Ma kî dikare ve înkar bike? Tevahiya şandeya dadgehê ya cezayê giran daye min piştre ji FETO’yê hate îxrackirin. Hinek hatin girtin jî lê cezayê dane min nehate betalkirin. Çima? Ji ber ku ez di çavê wan de ‘sûcdarekî potansiyel’ bûm.

 

MÎNA ERDAL EREN TEMENÊ MIN JÎ MEZIN KIRIN 

 

Tu sebiqeyên min nînin. Li derve gelek sûcdar hene û ku derdora 20-30 qeydên wan ên sûc hene. Lê ya min tenê sûcek jî tune ye. Jixwe heke wisa bûya ez niha girtî nedibûm! Ji ber ku têgehên edalet û hiqûqê li Tirkiyeyê berevajî tên bikaranîn. Hiqûqeke dijminatiyê di meriyetê de ye. Her carê qala curbicûrbûnê, biratiyê dikin. Lê em li hemberî hiqûqê jî wekhev nînin. Di rewşeke wiha de em çawa wekhev tên dîtin? Heke em wekhev bûna niha kesên bi rastî jî sûc kirin l derve, kujer li derve û kesên mîna me bêsûc jî di girtîgehê de nedihatin ragirtin. Heke hiqûq hebûya dê kujerê Hrant Dînk li hundir û em jî dê li derve bûna! Ev dewleta ku kujerekî ji ber ‘zarokbûn’ê berd dide, ev hiqûq, temenê min mezin dike û cezayê giran dide. Di esasê xwe de hêza despotîk her tim hiqûqê weke amûra cezakirina dijberên xwe bi kar tîne. 

 

TEMENÊ SEYÎD RIZA JÎ BIÇÛK KIRIN Û DARVE KIRIN 

 

Dewleta tirk, hiqûq her tim bi vî awayî bi kar anî. Di Serhildana Dêrsimê ya 1938’an de temenê rêberê serhildanê Seyîd Riza biçûk kir û darve kir. Di derbeya faşîst a 12’ê Îlonê de temenê ciwanê şoreşger Erdal Eren mezin kir û darve kir. Di roja me de jî temenê min mezinkir û cezayê muebbeta girankirî da ku cezayê ‘heta mirinê di girtîgehê de’ ye. Ev, şêweyê darvekirinê yê mordern e. Li şûna ku we li sêdarê bidarve bike, heta mirinê di hucreyeke yekkesî de dirizîne.” 

 

BAGER SAYAK KÎ YE?

 

Bager Sayak, di 20’ê Tîrmeha 2010’an de bi îdiaya ku li Erziromê “bombe daniye pêşiya avahiya avahiya AKP'ê ya bajar” hate girtin. Di 25’ê Tebaxa 1992’yan de ji dayik bûye û dema ceza lê hatî birîn 17 salî bû. Danişîna doza wî di 2’yê Mijdara 2011’an de li 4’emîn Dadgeha Cezayên Giran a bi Rayeya Taybet a Erziromê hat lidarxistin û xwest parastina xwe bi Kurdî bike. Lê daxwaza wî hate redkirin. Şandeya dadgehê, cezayê muebbeta girankirî da Sayak. 

 

Biryar ji bo temyîzê ji Dadgeha Bilind re hate şandin. Lê belê 9’emîn Daîreya Cezayan a Dadgeha Bilind, di 9’ê Adara 2012’an de daxwaza temyîzê red kir û cezayê li Sayak hatiye birîn erê kir. 

 

MA / Omer Gungor