Amadekariyên Newroza ku wê di 23 'ê Adarê de li Stenbolê bê pîrozkirin, dewam dikin. Di Newroza ku wê li Qada Yenîkapiyê di pêşengiya Kongreya Demokratîk a Gelan (HDK) de "Banga Aştî û Civaka Demokratîk" a ji aliyê Rêberê Gelê Kurd Abdullah Ocalan ve di 27'ê Sibatê de hat îlankirin bê pîrozkirin, tê payîn ku rojeva sereke be. Di pîrozbahiyê de wê hunermendên Navenda Çanda Mezopotamyayê (NÇM) Kadîr Çat û Grup Praksîs derkevin ser dikê. Di Newrozê de hevberdevka HDK'ê Alî Kenanoglu, siyasetmedar Gultan Kişanak, Hevserokê Partiya Wekhevî û Demokrasiyê ya Gelan (DEM Partî) Tuncer Bakirhan, Hevserokê Giştî yê DEM Partiyê Tayîp Temel, Endamê Heyeta DEM Partiyê ya Îmraliyê Sirri Sureyya Onder dê axaftinan bikin.

 

Pêkhateyên HDK'ê yên ku pîrozbahiya Newrozê organîze dikin, ji bo pîrozbahiyan banga tevlîbûnê kirin. Serokê Platforma Komeleyên Rojhilat û Başûrrojhilat (DGD) Abdulhakîm Daş diyar kir ku Newroz vejîn e û destnîşan kir ku gelê Kurd li qadên Newrozê têkoşîna xwe ya azadiyê bilind kiriye. Daş destnîşan kir ku ew ê bi "Banga Aştî û Civaka Demokratîk" a dîrokî ya Rêberê Gelê Kurd Abdullah Ocalan biçin Newrozê û destnîşan kir ku ev gav gaveke ji bo demokratîkbûyîna Tirkiyeyê ye. 

 

Daş banga tevlîbûna Newrozê kir û wiha got: “Kurdên ku li Stenbolê dijîn divê bêhtir li Newrozê xwedî derkevin. Divê Kurd bibin yek û doza mafên xwe bikin. Her tişt di rojekê de pêk nayê. Hinekî sebir divê. Bi ya min ev pêvajo wê bigihije encamê. Gelê Kurd heta ku mafê xwe bi dest nexe divê bi rihetî tevnegere. Zilm li gelê Kurd hat kirin, gundên me hatin şewitandin û gelek mirovên me hatin qetilkirin. Vî gelî berdêlên giranbuha da û hê jî ji bo rizgariya xwe têdikoşe. Ez bang li gel û baweriyên din jî dikim ku beşdarî Newrozê bibin.”

 

WATEYA NEWROZÊ

 

Serokê Federasyona Komeleyên Dêrsîmê (DEDEF) Alî Riza Bîlîr bal kişand ku Newroz têkoşîna hevpar a gelên bindest a li dijî zalim Dehak e û Newroz sembola têkoşînê ye. Bîlîr wiha axivî: "Çawa ku 1 'ê Gulanê ji bo gelên bindest rojeke girîng a hevgirtina gelan e, Newroz jî xwedî wateyeke bi vî rengî ye. Em wek komeleyên Dêrsimê bang li gelê xwe dikin ku tevlî bibin. Girîngiyeke din a vê Newrozê jî wê xwedîderketina li komkujiya li Elewiyan li Sûriyeyê be. Ji vê hêlê ve divê ji her qada jiyanê mirov beşdarî Newrozê bibin û li hemberî van hemûyan bertekên xwe nîşan bidin. Ev yek ji bo biratiya gelan girîng e. Em bang li hemû dêrsîmiyên li Stenbol, Enqere, Îzmîr, Edene û li her derê welat dijîn dikin ku tevlî bibin. Divê gelê me li her cihê ku lê ye beşdarî Newrozê bibe û dawî li zilm û komkujiyan bîne. Eger em li bendê bin û li van temaşe bikin, wê me tine bikin."

 

GIRÎNGIYA NEWROZÊ HÊ ZÊDETIR BÛYE

 

Serokê Federasyona Komeleyên Karakoçanê (KAR-DEF) Abdulazîz Akyol bi bîr xist ku Newroza Stenbolê ya 2024'an bi girseyî pêk hat û got ku Newroza îsal dê bêhtir girseyî be. Akyol da xuyakirin ku bi pêvajoya nû re girîngiya Newrozê hîn bêhtir zêde bûye û anî ziman ku ew xebatên xwe yên Newrozê didomînin û wiha got: "Ez difikirim ku di vê pêvajoya ku herî zêde aştî tê bilêvkirin de qadên Newrozê hem gelê Kurd hem jî gelên din wê dagirtî bin. Pêvajo girîng e. Divê ev civakî bibe. Lazim e her kes tevkariyê li vê pêvajoyê bike. Di vî warî de komeleyan jî xwedî gelek wezîfeyan e. Pêwîste yên herî zêde li dijî vê ne ji bo aştiyê îqna bikin. Ev fersendeke dîrokî ye. Lazim e vê firsendê baş bi kar bîne. Lewma ev Newroz ji bo aştî û biratiyê gelekî girîng e. Em li bendê ne ku her kes beşdar bibe."

 

MA / Melîk Çelîk