NAVENDA NÛÇEYAN - Hevserokê Koma Çep a PE'yê Martîn Schirdewan tevî şandeyekê bi fermanda YPJ'ê Rojhilat Efrîn û Fermandarê Giştî yê QSD'ê Mazlûm Ebdî re hevdîtin pêk anî û têkildarî geşedanên herêmî agahî wergirt.
Hevserokê Koma Çep a Parlamentoya Ewropayê (PE) Martîn Schirdewan û şandeya pê re di roja duyemîn a serdana Rêveberiya Xweser a Bakur û Rojhilatê Sûriyeyê de serdanên girîng kir. Şandeyê sibehê bi nûnerên Rêxistina Şaredariyên Bakur û Rojhilatê Sûriyeyê û piştî nîvro jî bi Fermandara Yekîneyên Parastina Jinan (YPJ) Rohilat Efrîn û Fermandarê Giştî yê Hêzên Sûriyeya Demokratîk (QSD) Mazlûm Ebdî re hevdîtin kir.
Di serdanê de Alîkarê Midûriyeta Giştî ya Navenda Rosa Luxemburg û Serokê Departmana Navneteweyî Philip Degenhardt, nûnerê saziyên Ewropayê ya DEM Partiyê Fayik Yagizay, asîstana Schirdewan Nora Friese-Wendenburg û asistana Yagizay Sarah Glynn bi Schirdewan re bûn.
Rayedarên Saziyên Şaredariyan di hevdîtinên serê sibê yên pêşkêşiyek ji şandeyê rekirin. Di pêşkêşkirinê de pirsgirêkên sereke yên ku ji aliyê rêveberiyên herêmî ve têne jiyîn hatin ravekirin. Rayedaran anîn ziman ku ji ber Tirkiye ava çem asteng dike, girtina Santrala Pompakirinê ya Ava Aloukê û bombebarankirina binesaziya herêmê di xizmetên bingehîn ên wekî av û elektrîkê de zehmetiyên cidî tên jiyîn. Hate gotin ku Tirkiye bi armanca ku avê ji Çemê Dîcleyê bîne, peymana bi UNICEFê re ya ji bo anîna avê asteng dike.
Rayedarên herêmî destnîşan kirin ku herêm bi gefa çolbûnê re rû bi rû ye û diyar kirin ku kêmasiyên xizmetguzariyên binesaziyê yên ji bo dabînkirina pêdiviyên koçberên navxweyî, hîn bêtir kûr bûne. Koçberên ji Şehba, Minbic, Serêkaniyê û Girê Spî li kampên penaberan ên Hesekê hatin bicihkirin; tevî ku 5 sal û nîv di ser re derbasbûne jî hin ji wan ji neçarî li dibistanan dijîn. Hate destnîşankirin ku ev rewş bi giranî mafê perwerdehiyê yê zarokên li herêmê binpê dike. Rayedaran her wiha anîn ziman ku alîkariya navneteweyî ya ji bo koçberan bi awayekî berbiçav kêm bûye.
Rawestgehek din a şandeyê Yekîneyên Parastina Jinan (YPJ) bû. Fermandara YPJ’ê Rohilat Efrîn diyar kir ku rêveberiya Şamê peymana pevguhertina girtiyan dereng xist û girtiyên YPJ’ê ji vê pêvajoyê derxist. Rohilat Efrîn dazanîn ku tevî vê yekê jî YPJ û QSD hêz û biryardariya xwe parastine û got, "Me amadekariyên xwe baş kirine û em ê destketiyên xwe biparêzin. Em bi biryar in ku avaniya artêşa Sûriyeyê biguherînin."
Di hevdîtina bi Fermandarê Giştî yê Hêzên Sûriyeya Demokratîk Mazlûm Ebdî re danûstandinên bi Şamê re hatin nîqaşkirin. Ebdî diyar kir ku hikûmeta Şamê ji bo Rêveberiya Xweser entegreyi avaniya Şamê bike bang li wan kiriye û lê ew dixwazin vê pêvajoyê li ser bingeha "hevkariyê" pêk bînin. Ebdî anî ziman ku divê welatên rojavayî hikûmeta Şamê teşwîq bikin ku peymanê bi cih bîne û destnîşan kir ku divê zextê li Tirkiyeyê bikin ku li gor agirbestê tevbigere, ev yek jiyanî ye.
Mazlûm Ebdî behsa jinûve avakirina herêmê kir û got ku pêwîstî bi bernameyên veberhênana biyanî yên berfireh heye ku tenê bi santralên enerjiyê ve sînordar nemîne û seranserê Bakur û Rojhilatê Sûriyeyê jî bigire nav xwe.