AMED - Hevserokê Giştî yê DEM Partiyê Tûncer Bakirhan ku li Amedê dest bi serdana partiyên siyasî kir diyar kir ku hevdîtina Abdullah Ocalan a bi lîderên Kurd re wê tevkariyeke mezin li pêvajoyê bike.

 

Hevserokê Partiya Wekhevî û Demokrasiyê ya Gelan (DEM Partî) Tûncer Bakirhan li Amedê serdana partiyên siyasî yên Kurd kir. Bakirhan pêşî çû serdana Partiya Mirov û Azadiyê (PÎA). Hevberdevkên Înîsiyatîfa Yekitiya Demokratîk Mehmet Kocak û Gulcan Kaçmaz Sayyigit û Berpirsyara Komîsyona Têkiliya Partiyên Siyasî û Alîgira Hevserokên Giştî Ozlem Gunduz jî amade bûn.

 

Hevserokê PÎA'yê Ahmet Kaya, Hevseroka PÎA'yê ya Amedê Banu Ay û rêveberên partiyê Bakirhan û hevalên wî pêşwazî kirin. Hevberdevka Înîsiyatîfa Yekîtiya Demokratîk Gulcan Kaçmaz Sayyigit diyar kir ku ev hevdîtin ji bo misogerkirina yekîtiya Kurdan girîng in.

 

Tûncer Bakirhan anî ziman ku di çarçoveya pêvajoyê de wan bi partiyên siyasî re civîn lidar xistin û wiha got: "Ji bo em rexne, pêşniyar û fikrên partiyên xwe kom bikin, me ev serdan pêk anî. Ji xwe Birêz Ocalan bi taybetî bal dikişand ser ku ew qîmetê dide fikrên partiyên Kurd û ji me xwest ku em bi baldarî li rexne û pêşniyarên wan ên li ser vê pêvajoyê guhdarî bikin û notan bigirin. Di serdana me ya din de xwest ku em li ser bingeha van hevdîtinan wî agahdar bikin. Me jî dest bi van serdanan kir. Partiyên me xwedî fikir û ramanên xwe ne. Ev pêvajo ne tenê ya ku di navbera DEM Partî û AKP'ê de tê meşandin e. Civaka demokratîk temsîla 86 mîlyon mirovî dike; ev têgihiştineke wiha nîşan dide ku heke were fêhmkirin 86 milyon kes li ser zemîneke demokratîk weke hemwelatiyên wekhev dikarin bêhnê bistînin û ji bo vê jî ev mesele me hemûyan eleqedar dike.”

 

Bakirhan da zanîn ku PÎA jî parçeyek ji pêvajoya nû ye û got, "Bi pêvajoyeke ewçend girîng a li ber dest re, fikrên PÎA ji bo me girîng in. Em ji bo vê armancê hatin, hêvîdar im wê hevdîtineke baş be."

 

Ahmet Kaya diyar kir ku dê piştgiriyê bidin pêvajoyê. 

 

Bakirhan piştre bersiv da pirsên rojnamevanan. Bakirhan bersiv da pirsa li ser daxwaza Abdullah Ocalan a hevdîtina bi lîderên Kurd ên mîna Mesûd Barzanî û Celal Talabanî re.

 

‘OCALAN GIRÎNGIYÊ DIDE YEKITIYÊ’

 

Bakirhan diyar kir ku Abdullah Ocalan girîngiyeke mezin dide yekitiya neteweyî ya Kurd û got, "Em qala lîderekî siyasî dikin ku ji salên 1990'î û vir ve gelek bangên yekitiya neteweyî ya demokratîk kiriye û banga kongreya neteweyî kiriye. Ez hêvî dikim ku di demên pêş de birêz Ocalan jî derbarê pêvajoya berdewam dike bi rêberên kurdan re nêrînan biguherîne. Ew ê pêşniyarên wan bistîne. Ev gelekî hêja û girîng e. Weke DEM Partî em di wê baweriyê de ne ku ev hevdîtin wê tevkariyeke girîng bike û divê pêk were."

 

DÊ 2 KONFERANS BÊN LIDARXISTIN

 

Civîn piştre ji çapemeniyê re girtî dewam kir. Bakirhan û hevalên wî piştre Komeleya Çanda Demokratîk a Şoreşger (DDKD) ziyaret kirin. Mehmet Kamaç li vir axivî û bal kişand ser yekitiya Kurdan. Kamaç diyar kir ku ew ê di 26'ê Tîrmehê de li Bazîdê û di destpêka meha Cotmehê de jî li Mêrdinê konferansekê li dar bixin.

 

Hevdîtin ji çapemeniyê re girtî dewam kir.

 

Bakirhan û heyeta DEM Partiyê wê piştre biçin serdana Partiya Komunîst a Kurdistanê (KKP), Partiya Azadî, Partiya Demokrat a Kurdistanê-Tirkiye û Partiya Sosyalîst a Kurdistanê (PSK).